საქართველოს კლიმატ-ტექნოლოგიების საჭიროებების შეფასება და პრიორიტეტული ტექნოლოგიების შემოტანისა და გავრცელების საგზაო რუკის მომზადება
სამუშაო შეხვედრა
საქართველოს გარემოს დაცვისა და სოფლის მეურნეობის სამინისტროს და მდგრადი განვითარების ცენტრის „რემისიას“ ორგანიზებით, 2023 წლის 23 მარტს სასტუმრო ბილტმორში ჩატარდა რიგით მეორე სამუშაო შეხვედრა, რომელიც სოფლის მეურნეობისა და შენობების სექტორში შერჩეული პრიორიტეტული ტექნოლოგიებისთვის მომზადებული სამოქმედო გეგმის განხილვას მიეძღვნა.
შეხვედრა მომზადდა პროექტის „ საქართველოს კლიმატ-ტექნოლოგიების საჭიროებების შეფასება და პრიორიტეტული ტექნოლოგიების შემოტანისა და გავრცელების საგზაო რუკის მომზადება“ ფარგლებში.
შენობებისა და სოფლის მეურნეობისთვის მიძღვნილ შეხვედრაზე „რემისიას“ წარმომადგენლებმა პროექტის მიზნებზე, პროექტის ფარგლებში განხორციელებულ და მიმდინარე აქტივობებსა და პროექტის შედეგებზე ისაუბრეს.
„რემისიას“ ექსპერტებმა შენობებისა და სოფლის მეურნეობის დარგში, შეხვედრის მონაწილეებს გააცნეს პროექტის ფარგლებში შემუშავებული სამოქმედო გეგმები, რომლებიც მოიცავდა შემდეგ მიმართულებებს: საქართველოში მშენებლობის სექტორში კლიმატ-ტექნოლოგიების გავრცელება, მეწყერისგან დაცვის მიზნით ნიადაგის ლურსმნებით გამაგრების ტექნოლოგია და სოფლის მეურნეობის სექტორში კლიმატ-ტექნოლოგიების დანერგვა.
პროექტის ფარგლებში, პრიორიტეტულ სექტორებზე შეირჩევა ოთხი კლიმატ-ტექნოლოგია, რომლებზეც მომზადდება ეკონომიკური ანალიზი, რაც მომავალში საფუძვლად ჩაედება ბიზნეს მოდელის შექმნას.
